Dy muaj pasi u shpallën në kërkim pas finalizimit të operacionit “Shpirti”, janë vënë në pranga dy ish-truprojat e ish-ministrit të Brendshëm, Saimir Tahiri. Hekuran Marku u arrestua në Gjermani, ndërsa Agustin Deda në Francë. Dy ish-truprojet e ish ministrit Saimir Tahiri, ishin në kërkim ndërkombëtar prej 2 muajsh, pasi dolën në përgjimet e megaoperacionit “Shpirti”. Të dy janë të dyshuar si i përfshirë në skemën e trafikut ndërkombëtar të kanabisit.
Bëhet fjalë kur ata ishin pjesë e trupës së shoqërimit të Saimir Tahirit, në kohën kur ky ishte ministër i Brendshëm, në vitet 2014-2016.
Dy ish-shoqëruesit e ish-ministrit Tahiri, në bashkëpunim me katër shtetas italianë dhe një shtetas shqiptar të quajtur Eltjon Bregu, trafikuan në rrugë detare nga Shqipëria drejt Italisë ngarkesën 1016 kilogramë kanabis, e cila i është sekuestruar shtetasve Fiqiret Seferi dhe Ferhat Ajdini që janë arrestuar në Bari. Në këtë dosje, dy ish-truprojet dyshohet se kultivuan drogë me shtetasin Eltjon Bregu dhe tentuan ta trafikonin për t’ua dorëzuar katër italianëve.
Si dëshmitarë drejtësie, dy nga skafistët kanë pranuar të kthehen bashkëpunëtorë dhe të penduar të drejtësisë. Më pas iu shtuan listës së të penduarve edhe Mariglen Shusha, Donial Drolli si dhe Elton Hamza.
Si u zhvillua operacioni “Shpirti”?
Ka qenë dëshmia e të penduarve të drejtësisë, që kanë pranuar të bashkëpunojnë me prokurorinë, duke rrëfyer për trafikun e drogës nga Shqipëria drejt Italisë. Ata kanë dhënë informacione për 3 vite, pas të cilave SPAK, në bashkëpunim me Antimafian italiane, Eurojust dhe DIA, kanë arritur të dokumentojnë aktivitetin kriminal të 4 grupeve që trafikonin drogë nga Shqipëria drejt Italisë dhe Spanjës. Janë 38 urdhër-arreste të prera, 10 prej tyre të prera më herët në operacionin “Kulmi”.
