Uniformat blu menjëherë janë venë në veprim, duke marrë masat për ruajtjen e familjes së deputetit të PS, Spartak Braho, pas lajmit se dy djemtë e tij, Kreshniku dhe Arbri, janë kërcënuar me armë nga Lejden Kadilli. Ky i fundit është një personazh mjaft i lakuar në botën e krimit në Durrës.
Sikundër duket nga foto në fjalë, në banesën e Brahos janë vendosur efektivë policie, për të garantuar sigurinë e familjes.
Një ditë më parë, qytetari digjital informonte për ngjarjen në fjalë ish-kryeministrin Berisha, i cili më tej përcolli detajet me anë të një statusi në rrjetin social Facebook. Kjo ngjarje u pasqyrua më tej nga Policia e Durrësit.
Në njoftimin e parë, bëhet me dije se është shpallur në kërkim dhe po punohet për kapjen e shtetasit me inicialet L.K., 26 vjeç, banues në Durrës, pasi për motive të dobëta dyshohet se ka kanosur me armë zjarri dhe i ka thyer xhamat e 2 mjeteve shtetasit K.B., 35 vjeç, banues në Durrës.
“Durrës/ Specialistët për Krimet në Komisariatin e Policisë Durrës. kanë shpallur në kërkim dhe po punojnë për kapjen e shtetasit L.K., 26 vjeç, banues në Durrës, pasi për motive të dobëta dyshohet se ka kanosur me armë zjarri dhe i ka thyer xhamat e 2 mjeteve shtetasit K.B., 35 vjeç, banues në Durrës.
Materialet i kaluan Prokurorisë së Rrethit Gjyqësor Durrës, për veprime të mëtejshme, për veprat penale “Kanosja”, “Shkatërrimi i pronës” dhe “Mbajtja pa leje dhe prodhimi i armëve, armëve shpërthyese dhe e municionit”, parashikuar në nenet 84, 150 dhe 278 të Kodit Penal”, shkruhet në këtë njoftim, por inicialet nuk përputhen me emrin që përmend Berisha në postimin e tij.
Në këtë komunikatë shkruhet se është kanosur me armë zjarri shtetasi me inicialet K.B., ndërsa denoncimi i Berishës i referohet djalit tjetër të deputetit, Arbër Brahos. Pra, sipas këtij versioni, mund të arrihet në përfundimin se Arbër Braho, ka shkuar për t’u hakmarrë ndaj autorëve të atentatit, që është bërë ndaj vëllait të tij, Kreshnikut.
Ky aludim vërtetohet në njoftimin e dytë të policisë, ku shkruhet: “Durrës/Më datë 19.08.2019 filloi procedimi penal për shtetasin A.B., 38 vjeç, banues në Durrës, sepse më datë 18.08.2019, në lagjen Nr. 4 Durrës, pas një konflikti për motive të dobëta ka goditur me sende të forta shtetasit A. K., 58 vjeç, dhe L.K., 30 vjeç, duke i shkaktuar dëmtime trupore. Neni 89 i K.P.”.
