Ministrja e Financave dhe Ekonomisë, Anila Denaj ka folur për një rritje të moderuar dhe jo një recesion të Shqipërisë post-koronavirusit.
Në një lidhje live për emisionin “Real Story” në News24, Denaj tha se muaji mars kaloi me një rritje prej 2%, ndërsa skenari më i keq është një deficit prej -5%.
Ministrja theksoi se duhet edhe një muaj e gjysmë për të bërë të gjitha llogaritë e nevojshme. Sipas saj, për situatën ekonomike më mirë do të flitet në muajin qershor.
“Në skenarin më negativ që nuk mund të mbledhim të ardhurat do të shihnim një rritje të deficitit në -5 % dhe deri tani jemi në 3.8, por duhet të shohim në tetor. Duhet të bëjmë likuiditetin e nevojshëm edhe pse FMN dhe Banka kanë bërë veprimet dhe instrumentet e nevojshme. Në variantin që kaluam në mars ka qenë një rritje ekonomike 2% me një prodhim të brendshëm bruto minimal, ishte brenda bllokimit 2%-shi. Ka qenë 4% shkoi në 2%. Nuk jemi akoma në fund të bllokimit. FMN ka parashikuar recesion ne kemi artikuluar një rritje të moderuar. Në aktin normativ të qershorit do të jetë i reflektuar. Më duhet dhe 1 muaj e gjysmë për të planifikuar uljen e të ardhurave dhe shpenzimeve. Aty ku ne shohim që disa shpenzime nuk duhet të bëjmë do i bllokojmë”, tha ajo.
