Deputetja Flutura Açka tha në Kuvendin e PD-së, se kjo parti nuk mund të përdoret vetëm për t’u pasuruar dhe më pas të merret peng për qëllime personale. Duke iu drejtuar Bashës ku e vlerësoi që ka reflektuar, ajo tha në shenjë këmbane alarmi se PD është një familje dhe se nuk mund të përdoret për privilegje. Deputetja, mjaft e drejtëpërdrejtë në fjalimin e saj, kërkoi që PD-ja të ndahet sot nga kjo mënyrë e të bërit politikë. Dhe se kush përfshihet në privilegjet e pushtetit, duhet të japë llogari për gabimet e shkaktuara.
“PD është shtëpi, familje, nuk përdoret vetëm për tu pasuruar, për privilegje e krekosje. E pastaj ta braktisësh. PD duhet të ndahet sot nga kjo mënyrë e të bërit politikë. Kush përfshihet në privilegjet e pushtetit, duhet të japë llogari për gabimet e shkaktuara. Krijimi i Aleancës Qytetare për Demokraci do na e bëjë më të mundur hapjen kah shoqëria shqiptare, aq e nevojshme për ne.
Kam dy fjalë të sinqerta me ju z. Basha. Më vjen mirë që ka ardhur një kohë reflektimi edhe për ju. Ta bëjmë PD-në vërtet demokratike, dhe të krijojmë mundësinë të qarkullojnë elitat”, tha Açka.
“E kuptoj hendekun që na është krijuar me bazën dhe kjo është e kuptueshme, por nga nesër ju duhet të ktheheni më shpesh dhe më bindshëm te demokratët. Ata janë duke pritur t’ua thoni në sy dëshpërimin e tyre. Afrimi më shumë te baza nuk është qasje konservatore, por njerëzore. Ju kërkoj të ndryshoni, të gjeni një X faktor, të ndërroni lëkurë. Në politikën shqiptare është krijuar klisheja se një politikan hyn i mirë në politikë, e del i keq. Jepni shembullin e kundërt. Ua kërkoj publikisht, hiqeni atë tonik ju i pari”, përfundoi ajo.
