Persona të paidentifikuar, mbrëmjen e sotme, rreth orës 18:00, në fshatin Krane, Bashkia Finiq, kanë reaguar në lidhje me një turp që qëndron prej kohësh në këtë zonë.
Si reagim ndaj faktit se aty nderohet një vrasës i shqiptarëve disa persona kanë grisur flamurin grek dhe kanë thyer memorialin e Thimio Lolit.
Memoriali është ngritur rreth 7 vite më parë, ndërsa në mbishkrimin tek pllaka përkujtimore thuhet “për pjesëmarrjen e tij në çlirimin e Maqedonisë greke nga pushtuesit bullgarë”.
Policia e Sarandës me të marrë njoftimin nga banorë të fshatit ka shkuar menjëherë në vendngjarje dhe ka nisur hetimet për të zbuluar autorët dhe zbardhur të vërtetën se pse ka ndodhur e tërë kjo.
Kryetari i Partisë Mega, Kristaq Kiço tha se “ky është një provokim i hapur që i bëhet minoritetit etnik grek”.
Por kush është Thimio Loli?
Ai është një ndër komandantët e bandave që sulmuan jugun dhe juglindjen e Shqipërisë duke kryer masakra të frikshme mbi banorët e pambrojtur. Qindra fshatra shqiptarë në vitin 1914 u shkretuan plotësisht, ndërsa shumë të vrarëve ende edhe sot nuk u dihen varret. Për të kujtuar këtë periudhë të kobshme mjafton të përmendësh 374 të vrarët në fshatin Panarit apo 217 të tjerët në Hormovë jo larg Tepelenës.
Nga viti 1900 deri ne 1944 Thimio Loli komandoi sulme të njëpasnjëshme kundrejt zonave shqiptare. Në zona të caktuara të Shqipërisë së jugut ende edhe sot ruhet një këngë ku banorët i bënin thirrje kapedan Sali Vranishtit të vinte e t’i shpëtonte nga dhuna barbare e Thimio Lolit. Ky personazh që sot ka një memorial në Shqipëri ka marrë pjesë edhe në masakrat ndaj popullësisë çame, duke qenë një ndër bashkëpunëtorët e Napoleon Zervës.
