Fjalori banal prej disa kohësh është kthyer në diçka të zakonshme në Parlament. Teksa nga foltorja i drejtohen kundërshtarëve me akuza të ndryshme , deputetët duket se nuk kursehen dhe për ofendime. Fjalë të cilat etika e aq më tepër pozicioni i tyre i ndalon. Aq saqë ndonjëherë duket sikur salla e Kuvendit kthehet në një “fushë beteje” se kush mund të shajë e degjenerojë më shumë tjetrin.
Por, harrojnë se në një situatë të tillë të gjithë dalin të degjeneruar. E fundit ishte seanca plenare e datës 31 janar, ku politikanët shqiptarë dhanë një tjetër shfaqje për shqiptarët. Tirana Today pyeti qytetarët se çfarë ata mendojnë për fjalorin e përdorur nga të zgjedhurit e tyre.
“Më keq nuk ka ku të shkojë gjuha e përdorur në Parlament. Është e përsëritur disa herë, nuk është diçka e re për ne. Çdo të enjte është i njëjti avaz.”
“Qëllova që e pashë direkt seancën plenare u trembëm dhe ne që jemi moshë e madhe, lëre më ta dëgjojë një fëmijë i vogël. Ndërkohë që ne mundohemi t’i mësojmë fëmijët të flasin me edukatë, por dëgjojmë në televizor një gjuhë të tillë. Dhe pikërisht nga drejtuesit e vendit tonë.”
“Pse e bukur është ajo lloj gjuhë, është shumë e keqe. Janë të paedukatë, pa respekt. Turp që na përfaqësojnë pikërisht ata njerëz. Ka persona shumë herë më të denjë.”
Ndërkohë, një qytetarë i vendos gishtin ish-kryeministrit Sali Berisha si fajtor për rrëmujën e krijuar në Kuvend.
“Shumë keq është gjuha që përdorin politikanët. Nëse ju kujtohet juve, Parlamenti i parë ka qenë model. Në kohën e ardhjes së Sali Berishës gjithçka ndryshoi. Saliu u fut kunja edhe këto fluturojnë me presh. Kur nuk është Saliu rri i qetë Parlamenti, ai përdor dhunë dhe fjalë ofenduese.”
Por, me kundërpërgjigje një tjetër qytetarë shprehet për Tirana Today se sipas tij vetëm Berisha është i drejtpërdrejtë.
“Berisha është realist, i thotë gjërat ashtu siç janë. I vetmi në Parlament që është kaq i drejtpërdrejtë.”
Dhe në mes të diskutimeve të dy palëve, qëndrojnë ata njerëz të cilët nuk fajësojnë një emër të caktuar. Por, për ta e gjithë klasa politike është në mjerim dhe po i bëjnë veç dëm popullit.
“Njësoj janë ato, si majtas si djathtas vajmedet për këtë vend.”
“Më vjen turp të them që jam shqiptarë. Nuk e di kujt t’i them politikanë. Pse këto e përfaqësojnë Shqipërinë? Nuk janë shqiptarë këto, padyshim këto janë të gjithë hajdutë, mashtruesa, veç po tallen me popullin. Pse për të përmendur nevojtoren e kemi zgjedhur kryeministër atë?! Është turp, nuk përdoren ato fjalë të poshtra, se banjën e kemi bërë pas shtëpie dhe jo para derës.”/ TIRANA TODAY
