Pasi opozita dogji mandatet, analistë dhe gazetarë në studion e emisionit “Të Paekspozuarit” në News 24, kanë zgjedhur të komentojnë fjalimin e parë të kryeministrit Edi Rama, i cili e nisi me ndjesë dhe e mbylli me dorë të shtrirë, por i bindur se vendi nuk do të shkojë në zgjedhje të parakohshme.
Analisti Andi Bushati, u shpreh se u habit që kryeministri doli të kërkonte falje për arrogancën dhe nuk dha asnjë përgjigje për shkaqet që shtynë opozitën të ikte nga Parlamenti.
“Nuk mendoj që e keqja e Ramës apo këtij reagimi të parë ishte tek fakti që i mbahej fryma apo mezi i dilnin fjalët. Në këtë gjendje fizike e kam parë vetëm pas protestës së Kukësit. Pas vendimit ekstrem të opozitës kuptuam se Rama është i gatshëm ta kthejë vendin në parti shtet. Ne shohim një njeri që del e kërkon falje se është ironik me gazetarët, se del me atlete apo brekushe. Kur dëgjova këtë thashë, e erdhi në mendje një pyetje e thjeshtë: është budalla apo bën vetë? Ky kërkon falje se vesh brekushe kur akuza ndaj tij është se po vjedh zgjedhjet e bashkëpunon me kriminele. Nuk e di në ishim në teatër apo Rama nuk e kupton”,- tha Bushati.
Ndryshe nga Bushati mendonte gazetari Carlo Bollino. Sipas tij, Rama kishte përgënjeshtruar akuzat për lidhje me krimin, ndërsa pranonte se shit-blerja e votive ka ndodhur në Shqipëri.
“Unë kam dëgjuar edhe përgënjeshtrimin e thellë të lidhjes me krimin. Tha që ndodh në Shqipëri të ketë pasur shit-blere votash. Ka ofruar mundësinë e dialogut, përjashtoi mundësintë e zgjedhjeve të parakohshme. Pra, dha një përgjigje politike”,- tha Bollino.
Ndërsa sipas Lubonjës, ajo që ra në sy në fjalimin e Ramës ishte fakti se vijonte të krahasonte të bardhët me të zinjtë dhe të mirët përballë të këqijve, situata kjo shtoi ai, që është parë edhe në deklarata të mëparshme.
Ai renditi edhe disa faktorë që tregojnë dhe përligjin situatën e vështirë në të cilën ndodhen shqiptarët, i nisur fillimisht nga largimet masive të shqiptarëve nga vendi, e deri tek korrupsioni dhe vjedhja e parave nga një grup oligarkësh.
“Të them të drejtën, unë ndoqa pjesën e parë. Këtë që kishit ju, nuk e ndoqa dot. Ajo që më bëri përshtypje ishte fakti, kur krahasoi që ne nuk jemi si ata. Kishte një mani të Ramës për të krahasuar pjesën mes të zinjve dhe të bardhëve. Dy tre tregues që janë ndër më themelorët janë; rritja e numrit të shqiptarëve që duan të lënë vendin është shumë e lartë mbi 53 për qind. Sa i takon korrupsionit e ul më poshtë. Një varfërim, një shtrëngim gjithandej, sepse do të shkojnë paratë tek oligarkët. Dhe një përpjekje për të kontrolluar të gjitha pushtetet si asnjëherë tjetër. Ke parë një kryeministër Renzi tv, meqë kemi edhe Bollinon këtu. Prirja për të kapur të gjitha pushtetet, por së fundi edhe drejtësinë”, tha ai.
Ndërkohë Enkelejd Alibeaj shtoi se opozitës i ishte mohuar çdo instrument poltik në përballje me qeverinë, ndërsa theksoi se djegia e mandateve ishte e vetmja alternativë që shkon në proporcion me realitetin.
“Se ka menduar asnjëherë, sepse nuk njeh realitetin. Ndoshta se ka njohur mirë opozitën. A ishte një akt proporcional me situatën apo jo? Lënia e mandateve dhe parlamentit parti-shtet, a është proporcional me këtë situatë, ne besojmë që po. Ne na mohohej, kërkesa për të thirrur ministrat në interpelancë, na mohohej e drejta për të thirrur kryeministrin në interpelancë. Këtu sistemi politik ka rënë dhe e dyta; shteti i së drejtës ka rënë. Duke qenë se kanë rënë këto dy sisteme, ajo që na ka mbetur ne si opozitë është që ta nxjerrim lakuriq në sy të publikut se çfarë qeveria dhe çfarë sistemi kanë shqiptarët.”, tha ai. (BalkanWeb)
