Barcelona është rikthyer tek fitoja në La Liga pas tre barazimesh dhe një humbje, por kjo mund të jetë fitorja më e dhimbshme e atalanasve. 4-2 ka përfunduar ndeshja e cila u zhvillua në Camp Nou ndaj Sevillas dhe Barça është rikthyer në vendin e parë, por në minutën e 26’ Lionel Messi është detyruar të lejë fushën i dëmtuar. Vendin e tij e ka marrë Ousmane Dembele.
Katalanasit kanë dominuar sfidën që nga starti, pasi Coutinho gjeti golin e avantazhit në minutën e 2’. Dhjetë minuta më pas ishte Lionel Messi që ka shënuar golin e dytë pas një pasimi të bukur të marrë nga Suarez.
Uruguaiani ka qenë protagonist edhe në pjesën e dytë, duke realizuar golin e tretë të Barcelona-s në minutën e 63-të me penallti. Një lajm i mirë ky për sulmuesin, i cili nuk shënonte që nga 15 shtatori i kaluar, kur “blaugranat” kanë mundur 2-1 Real Sociedad në transfertë, në javën e katërt të La Liga-s.
Miqtë kanë reaguar 11 minuta para fundit, duke ngushtuar diferencat në 3-1 me Sarabia-n, por vendasit janë kundërpërgjigjur menjëherë me Rakitic, që ka shënuar golin e katërt për ekipin e Valverde. Në minutat e fundit ka patur kohë edhe për golin e dytë të Sevilla-s, që ka shënuar me Muriel. Kjo ka qenë humbja e parë e pësuar nga Sevilla pas katër fitoresh radhazi të marra në kampionat. Ata mbajnë vendin e tretë në renditje me 16 pikë.
Mbetet për tu kuptuar shkalla e dëmtimit të Messit. Pasi Barcelona kthehet në fushë përballë Interit në mesjavë, në ndeshjen e vlefshme për Champions League. Ndërsa në fundjavë ata do të presin Real Madrid në “Camp Nou”. Sfida këto që do të bëheshin akoma më të vështira për Barçën pa Leo Messi-n.
