Presidenti Ilir Meta firmosi sot dekretin për anulimin 30 qershorit, si datë për zhvillimin e zgjedhjeve vendore. Ndër argumentet që dha para mediave, lidhet me faktin se zgjedhjet nuk mund të zhvillohen pa garë dhe pa pjesëmarrjen e opozitës, pasi do të sillte një përshkallëzim dhe rrezik serioz për sigurinë publike dhe paqen në vend.
Në një konferencë të jashtëzakonshme para gazetarëve, kreu i Shtetit, Ilir Meta, lexoi arsyet që e bindën për të ndërmarrë një vendim të tillë. Por siç duket, jo vetëm kryeministri Rama është kundër. Në të njëjtën linjë qëndron edhe avokati Saimir Vishaj, i cili shprehet se Ilir Meta nuk mund të vetë-shfuqizojë dekretet e tij.
Saimir Vishaj, kreu i Shoqatës së Avokatëve Penalistë thotë se Meta nuk mundet të shfuqizojë dekretin e tij, dhe se këtë mund ta bëjë vetëm Gjykata Kushtetuese.
“Kjo nuk është e shkruar në asnjë dispozitë të Kushtetutës ku janë kompetencat e Presidentit. Presidenti mund të shfuqizojë ligje, por jo të shfuqizojë dekretin e tij. Dekretin e tij e shfuqizon vetëm Gjykata Kushtetuese”, tha Vishaj, në një intervistë për “Report Tv”.
Edhe dekretin e Presidentit për anulimin e zgjedhjeve, Vishaj thotë se mund ta marrë në shqyrtim vetëm Gjykata Kushtetuese. Sipas tij, situata në fjalë është në dorë të politikës.
“Palët duhet të ulen në tavolinë. Nuk ka ndërhyrje juridike për sa kohë nuk kemi një pushtet gjyqësor, për sa kohë nuk ka Gjykatë të Lartë”, tha Vishaj gjatë intervistës.
