Financimet ruse kanë qenë në fokus të takimit që ka zhvilluar kreu i Grupit Parlamentar të PS-së, Taulant Balla me ambasadoren Yuri Kim gjatë ditës së premte. Balla nënvizoi ndër të tjera se asnjë vend nuk është imun ndaj kërcënimeve që vijnë nga Rusia, dhe e mekanizmat mbrojtës duhen adresuar. Sipas tij, rasti i bërë publik është një rast alarmi. “Kemi diskutuar për këtë çështje. Nuk mbaj mend sa herë kam dalë dhe kam folur për dyshimet e një skeme financimi të PD-së, nga një kompani guackë. Duhet të themi që as Shqipëria dhe asnjë vend nuk është imun ndaj kërcënimeve që vijnë prej shumë vitesh nga përpjekjet e Rusisë, për të dëmtuar demokracinë në vendet jo miqësore. Rasti i bërë publik është një rast alarmi, është një zile alarmi dhe në të gjitha vendet, këto përpjekje kanë ndodhur. Keqardhja është që në rastin e fundit kishte shifra konkrete. Rritja e mekanizmave mbrojtës duhen adresuar. Kemi miratuar edhe ne një sërë rekomandimesh përmes një rezolute, që ka të bëjë me dezinformimin dhe ndërhyrjen e aktorëve të huaj në çështje të brendshme. Ne duhet të fillojmë të mendojmë se si duhet të rrisim transparencën e financimit, sipas parimeve më të mira ndërkombëtare, në mënyrë që të kuptojmë që në rast të identifikimit të financimit nga burime apo aktorë të tjerë jo miqësorë me Shqipërinë, duhet të jemi të mbrojtur”, tha Balla.
Rusia ka dhënë fshehurazi mbi 300 milionë dollarë për parti politike dhe kandidatë në dhjetëra vende, që nga viti 2014 dhe Presidenti Putin është angazhuar në financim të fshehtë politik në mbarë botën, sipas një zyrtari të lartë amerikan. Sipas një burimi me njohuri mbi raportin amerikan të zbulimit, Shqipëria është një nga këto vende.
“Në Shqipëri, Rusia i dha rreth gjysmë milioni dollarë Partisë Demokratike në 2017 përmes kompanive fantazëm”, tha burimi i qeverisë amerikane.
