Për shkarkimin e Presidentit Meta, pritet që Komisioni i Venecias të mbërrijë në Tiranë në datat 10 dhe 11 shtator. Delegacioni pritet të japë opinionin në lidhje me ligjshmërinë e veprimeve të Presidentit.
“Një delegacioni i Komisionit të Venecias do të vizitojë Shqipërinë në kuadër të përgatitjes së draft-opinionit, lidhur me fuqinë e Presidentit për vendosjen e datave të zgjedhjeve në sistemin parlamentar”, thuhet në njoftim.
Delegacioni i Venecias do të takohet me kryeministrin Edi Rama, Gramoz Ruçin, me përfaqësuesit e Komisionit Hetimor, me përfaqësuesit e KQZ-së dhe kryetaren e Gjykatës Kushtetuese.
Gjatë ditëve të fundit, Meta konfirmoi praninë e tij të hënën në Parlament, për të dëshmuar në Komisionin Hetimor “Mbi kontrollin e ligjshmërisë së veprimeve të kryera nga ana e Presidentit të Shqipërisë, në kuadër të kompetencave të tij lidhur me zhvillimin e zgjedhjeve për organet e qeverisjes vendore”. Përmes një postimi në Facebook, zëdhënësi i tij, Tedi Blushi ka bërë me dijeni edhe orën e saktë në të cilën Meta do të jetë në Parlament, ekzaktësisht në 09:59.
Po kështu, fundjava ka nisur me disa mesazhe nga Kreu i Shtetit, që duket se i drejtohen dy liderëve, të Partisë Socialiste dhe Partisë Demokratike. Pasi publikoi videon e 11 viteve më parë, ku paralajmëronte kundër çdo marrëveshje që dhunonte Kushtetutën, Meta publikon një video të dytë, kësaj here me një “buqetë macesh”.
Meta nxjerr fjalimin e 11 viteve më parë: Nuk do të bëjmë asnjë kompromis me…
Një prej maceve i ka qëlluar guximtare presidentit, dhe teksa ngjitet lart, ajo nuk llogarit rrezikun në kthim. Gjithsesi, Meta është aty për t’ia bërë të lehtë zbritjen.
