Sot Kukësi fillon aventurën Champions League dhe në “Loro Boriçi” do të përballet me kampionët e Maltës, Vallata. Në orën 19:00 të besuarit e Peter Pacult do të zbresin në fushë për të realizuar ëndrrën e grupeve të Europa League, pasi grupet e Championsit duken si mjaft të vështira. Objektivi i Kukësit është një dhe i vetëm të kalojë me çdo kusht turin e parë në Champions për të siguruar minimalisht pjesëmarrjen në turin e tretë kualifikues të Europa League.
Presidenti Gjici është treguar i qartë me skuadrën duke u thënë se kalimi i këtij turi është detyrim dhe për të krijuar një atmosferë sa më të zjarrtë në Shkodër, ka siguruar autobuzë për të transportuar tifozë nga tre destinacione të ndryshme.
Kukësi vjen me shumë ndryshime teksa vetëm 5 titullarë nga skuadra e sezonit të kaluar pikërisht Frashëri, Shameti, Musolli, Dzaria dhe Shkodra priten ta nisin që nga fillimi takimin e sotëm, ndërsa do të debutojnë me verilindorët 6 nga 12 afrimet e kësaj vere, shkruan SS. Maja e sulmit do t’i besohet Sebino Plakut i cili po kalon një formë shumë të mirë, ndërsa në krahët e mesfushës do të aktivizohen Çyrbja dhe Shpehar, në mbrojtje do të ketë tre risi, Qaqi në qëndër dhe braziliani Melo e Zguro nga krahët. Një fitore sot në Shkodër do të bënte që Kukësi të shkonte me shumë besim në sfidën e kthimit pas një jave në Maltë edhe pse verilindorët ashtu siç bëri Shkëndija e Tetovës dje do të bëjnë gjithçka për të mbyllur llogaritë me Valletan që në ndeshjen e parë.
