FIFA ka njoftuar nisjen e një kompeticioni të ri, që do të luhet për herë të parë në verën e vitit 2021. Bëhet fjalë për ‘Kupën e Botës për Klube’, edicioni i parë i së cilës i është besuar Kinës. Lajmi u konfirmua nga presidenti Gianni Infantino, që nga Shangai e ka cilësuar një “vendim historik”.
Kupa e Botës për Klube do të zëvendësojë Kupën e Konfederatave dhe do të zhvillohet një herë në katër vjet, ndërsa në fazën finale do të marrin pjesë 24 skuadra të ndara në tetë grupe.
Evropa do të përfaqësohet me tetë skuadra, fitueset e ‘Champions League’ dhe Ligës së Evropës në edicionet 2018/2021 të dy turneve më të rëndësishëm të futbollit në kontinentin e vjetër.
Kjo do të thotë se deri tani kanë siguruar pjesëmarrjen Real Madrid, Liverpool, Chelsea dhe Atletico Madrid. Amerika e Jugut do të ketë gjashtë skuadra, ndërsa pjesa tjetër do të ndahet mes Konfederatave të tjera kontinentale.
