Deputeti i Partisë Socialiste, Fidel Ylli i bëri thirrje kryeministrit Edi Rama që të rihapen sërish pikat e basteve, pasi ekonomia mund të fitojë shumë para nga ky sektor.
I ftuar në emisionin sportiv “Paso” në Top Albania Radio, Ylli u shpreh se as në kohën e ish-diktatorit Enxer Hoxha, pikat e bastave nuk u arritën të mbylleshin.
Fidel Ylli: “Në të gjithë botën ka baste, në Angli ka baste, në Itali ka baste, u bë mirë për momentin që u mbyllën sepse ishin bërë si kërpudha, çdo tre metra një pikë. Tani po funksionojnë ‘underground’ (fshehur nëntokë) shteti nuk merr asnjë para, janë të gjithë në të zezë.
Nuk i mbylli dot Enver Hoxha… në kohën e komunizmit kishte baste është dënuar edhe Andrea Marku atëherë për baste, tek lagjja jonë bëheshin hapur. Kështu që unë mendoj që qeveria duhet ta ketë në vëmendje këtë, unë ja kam thënë edhe kryeministrit.
I bëj thirrje kryeministrit dhe nga Top Albania Radio… dhe në bisedë me të sa herë që flas ja përmend dhe i them që janë para që sporti i merr nga të ardhura dytësore”.
Sipas Yllit, kryeministri e ka ndërmend rikthimin e basteve, por për momentin vëmendja është në gjëra më të rëndësishme jetësore.
