Në orët e para të mëngjesit të kësaj së premteje, një ngjarje e rëndë ndodhi në rrugën “Eshref Frashëri”, në zonën e Don Boskos. Xhafer Mata 31 vjeçari nga Kukësi, vrau 19 vjeçaren Xhuljeta Çuni, si edhe qëlloi për vdekje mbi veten.
Dy të rinjtë ishin në një lidhje sentimentale me njëri-tjetrin dhe ky ishte një tjetër krim pasioni që tronditi kryeqytetin. Rreth gjashtë muaj më parë, një ngjarje e ngjashme ndodhi pranë Fakultetit të Mjekësisë. Ku 23-vjeçari Aldison Beluli qëlloi për vdekje studenten 21-vjeçare, Arjela Murati dhe më pas qëlloi edhe veten. Të dy djemtë humbën jetën në spital.
Për ditë me radhë çështja e të rinjve nga Fieri ishte tema e mediave, në kafene, në bisedat që dëgjoje në rrugë. Pasi bëhet fjalë për krime të ndodhura pikërisht në rrugë, në mes të ditës. Dhe gjithçka ka ndodhur në emër të asaj që ata kanë pretenduar se kanë pasur, dashuri.
“Kjo nuk është dashuri. Janë ngjarje që na kanë tronditur të gjithëve. Nuk po arrijmë ta kuptojmë se çfarë po ndodh me këta të rinjtë e sotëm,”-shprehen qytetarët për Tirana Today.
“Rinia të mos tërbohet kaq shumë. Janë pa punë, pa shkollë, të droguar, të rinjtë e sotëm i kanë të gjitha të këqijat, prandaj është fatkeqësi e madhe. Nuk mund të vrasësh një njeri në emër të dashurisë, një lidhje e tille nuk është dashuri.”
Banorët të cilët ishin pranë vendit ku ndodhi ngjarja ditën e sotme, thonë për Tirana Today se janë të tronditur, gjithçka ndodhi shumë shpejt. Dhe ajo që është më shqetësuese është fakti që ky fenomen po përhapet shumë tek të rinjtë.
“Këto fenomene më parë jo se nuk kanë ndodhur, por kanë avancuar shumë këto kohët e fundit. Një gjë duhet të dinë të rinjtë, kur ajo nuk do, lëre në punën e vetë.”
Edhe pse në gjendje të rënduar psikologjike, duket se sot të marrësh jetën e tjetrit në emër të dashurisë, po kthehet në një akt heroizimi nga ana e atentarotit. TIRANA TODAY
