Çdo ditë shohim dhe takojmë njerëz që kanë nevojë. Por më fatkeqët janë fëmijët e mbetur jetimë që nuk kanë asnjë të ardhur dhe shpesh pa një strehë për të futur kokën.
I tillë është rasti i fëmijëve të familjes Sorra në Kashar. Dy muaj më parë në emisionin “Stop”, drejtori i fondacionit “Fundjavë Ndryshe”, Arbër Hajdari prezantoi kushtet shumë të vështira të kësaj familje. Në atë kohë, kryefamiljari Ferit Sorra vuante nga kanceri në mushkëri, ndërkohë që nuk përfitonte as KEMP. Familja Sorra merrte vetëm 60 mijë lekë në muaj, ndërsa 37 mijë lekë paguan vetëm faturat e energjisë elektrike.
Kjo familje jetonte në një banesë që rrezikonte të shembej nga dita në ditë. Me publikimin e rastit të kësaj familje, Balfin Group me drejtues Samir Mane, shprehën gatishmërinë për t’i ndërtuar shtëpinë e re.
Ditët e para pasi “Fundjavë Ndryshe” shembi shtëpinë e vjetër dhe nisëm një të re, babai i sëmurë ndërroj jetë, duke lënë pas 3 fëmijët e tij të vegjël dhe bashkëshorten.
Humbja ishte shumë e madhe për fëmijët, por gëzoheshin çdo ditë nga pak kur shihnin se si ndërtohej shtëpia e tyre e re dhe se njerëzit nuk e kishin lënë vetëm.
“Fundjavë Ndryshe” me ndihmën e madhe të Balfin Group me drejtues Samir Mane dhe emisionit “Stop” mundën t’i lehtësonin sadopak dhimbjen e madhe duke i ndërtuar një shtëpi të re dhe gjithashtu një pension afatgjatë.
