Një skenë si në filma ka ndodhur në Kamëz, ku një person ndaj të cilit policia i kishte shkuar në shtëpi për ta shoqëruar, ka nxjerrë armën duke i kërcënuar se do i vriste nëse do t’i afroheshin. Drejtori i Policisë Tiranë, Rebani Jaupi, sqaroi se bëhej fjalë për një besimtar, i cili iu kishte ndaluar vajzave të tij, që të shkonin në shkollë.
Shtetasi Ronald Kryemadhi, pengonte fëmijët të mësonin, me pretendimin se i shkollonte Allahu. Efektivët e Komisariatit Kamëz i kanë shkuar ditën e djeshme në shtëpi, për të bërë shoqërimin e detyrueshëm pasi Ronald Kryemadhi është në gjyq për “dhunë në familje”.
Ai ka nxjerrë armën drejtuar policëve, dhe duke kërcënuar se do të vriste edhe fëmijët. Policia është rikthyer sërish sot në banesë, por kanë hasur rezistencë nga ana e agresorit.
Për këtë arsye, efektivë nga Drejtoria e Policisë së Tiranës, FNSH dhe RENEA kanë rrethuar shtëpinë, duke bërë evakuimin e banorëve.
Pas negociatave që kanë zgjatur për 40 minuta, autori është vetëdorëzuar.
