Një javë pas atentatit që iu bë në godinën e Bashkisë, kryebashkiaku i Lushnjes, Fatos Tushe, është rikthyer sot në zyrën e tij. Në një prononcim për “Fax News”, ai është shprehur se lidhur me këtë ngjarje, çdo gjë do ia lërë në dorë drejtësisë.
“Po patjetër që ndodhem në punë sot. Kalova plagë të lehta, dëmtime të lehta, plagë më të rënda janë ato që shkruhen dhe thuhen në media. Drejtësia do të vendosë të thojë fjalën e saj, për atë që ka ndodhur.
Unë u falenderoj për telefonatën, por do të jetë drejtësia që do të vendosë lidhur me të gjithë këtë. Nuk kam pasur kontakte me ish-shoferin tim prej shumë kohësh. Ju lutem, siç iu thashë dhe pak më parë do të jetë drejtësia ajo që do të flasë për të gjitha. Ju falenderoj dhe ju uroj një vit të mbarë”, tha ai.
Në 31 dhjetor, ish-shoferi i tij Gëzim Saraçi i hodhi granatën në zyrë, ku aty u plagosën Tushe dhe sekretarja e tij Erisa Qalliu.
Atentati ndaj Tushes ndodhi në zyrën e tij, ku mbeti e plagosur më rëndë sekretarja e kryebashkiakut, Erisa Qalliu. Pas ngjarjes ka pasur akuza, veçanërisht nga ana e opozitës se Gëzim Saraçi dhe Tushe kanë qenë të implikuar në pazare droge, dhe kjo ka bërë që mes tyre konflikti të degjenerojë në një veprim të tillë.
Ndonëse nuk punonte më si shofer i Tushes, Saraçi figuronte ende në borderonë e Bashkisë së Lushnjes, nga ku merrte edhe rrogën.
