Përfaqësuesi i Policisë Rrugore, Albert Dervishaj ka shpjeguar në mënyrë të detajuar oraret e lëvizjeve, mënyrat e qarkullimit me automjet dhe ndëshkimet për shkelësit.
Në një lidhje të drejtpërdrejtë me emisionin “Opinion”, Dervishaj tha se fasha e re orare 05:00-17:30 është edhe për automjetet, edhe për këmbësorët.
Por kjo fashë orare thekson ai është vetëm për ata që kanë siguruar një leje për qarkullim. Sa i përket qarkullimit me automjet, Dervishaj tha se ata që duan të lëvizin për punë mund të marrin një vetëdeklarim në portalin e-Albania.
“Sikurse jemi në dijeni, në bazë të vendimeve të komitetit të emergjencave civile, nga dita e hënë ka filluar të zbatohet një fashë e re orare, për lëvizjen e automjeteve edhe të këmbësorëve.
Sipas të cilës, fasha orare do të jetë nga ora 5 e mëngjesit deri në 17 e 30 për lëvizje të qytetarëve të cilët brenda kësaj fashe do të kryejnë nevoja të furnizimit, pazarit, blerje medikamentesh apo shërbime të tjera. Gjithmonë këta janë me leje duke bërë aplikimin në aplikacionin e-Albania.
Për çdo familje një person do të dali për të bërë pazar. Moshat e treta, që kanë një brez të caktuar dhe sistemi nuk ua lejon, automatikisht nuk do lejohen. E veçanta është tek automjetet. Automjetet do të lejohen të lëvizin për nevoja pune përmes autorizimeve apo vetëdeklarimeve që kanë marr për momentin. Autorizimet janë të vlefshme, me një kusht që askush nuk ta të drejtë të abuzojë me autorizimin. Çdo qytetar që është në punë të shkojë dhe të kthehet nga puna, por jo të dalë për xhiro”, tha ai.
Sa i përket automjeteve që iu duhet të lëvizin përtej fashës së vendosur nga qeveria, Dervishaj tha se:
“Ne kemi një listë të miratuar nga Ministria e Shëndetësisë, sipas të cilës të gjitha bizneset e lejuara do të vazhdojnë aktivitetin brenda të gjitha kondicioneve që kanë deri tani. Një pjesë e veprimtarisë që kanë të bëjnë me furnizimin e qytetarëve shqiptarë me ushqime apo aktivitete të tjera, sigurisht që këto do të lejohen brenda fashave orare”.
