Në sajë të operacionit të koduar “Testet”, është vënë në pranga pronarja e një agjencie udhëtimi, pasi falsifikonte testet për Covid-19. Policia e Durrësit ka arrestuar 56-vjeçaren me inicialet A. R., pasi akuzohet se falsifikonte testet për Covid-19, në emër të një klinike në Tiranë.
Gjithashtu u kapën dhe u proceduan penalisht dy persona, të cilët tentuan të kalonin kufirin për në Itali, me teste të falsifikuara nga pronarja e agjencisë së udhëtimit.
Lidhur me këtë rast, materialet i kaluan Prokurorisë së Rrethit Gjyqësor Durrës, për veprime të mëtejshme, për veprat penale “Falsifikimi i dokumenteve shëndetësore” dhe “Fshehja e të ardhurave”.
