Ish-kreu i Kadastrës së Vlorës, Klodjan Troçi, do të qëndrojë në burg. Vendimi është caktuar sot nga Gjykata e Vlorës.
Gjyqtari Enkel Peza, pasi dëgjoi pretendimet e mbrojtjes dhe të prokuror Alfred Sali, ka vendosur që Troçi të qëndrojë nën masën e sigurisë “arrest në burg”. Troçi akuzohet se në bashkëpunim me zyrtarë të tjerë, tashmë të arrestuar, falsifikonin dokumentet e pronave.
Gjatë kontrollit në shtëpinë e Troçit, policia gjeti edhe një shumë parash. 100 kartëmonedha 500 euro i janë gjetur ish-kreut të Kadastrës së Vlorës. Po ashtu, veçmas u gjet edhe shuma tjetër prej 15 mijë eurosh.
Troçi u vu në pranga pas hetimeve disa javore, për tjetërsimin e pronave në bregdetin e jugut. Ai dyshohet se ka bashkëpunuar nga viti 2019 deri në vitin 2021 me Bardhyl Gjikën, i cili drejtoi drejtorinë e administrimit të tokave në Vlorë dhe specialistin në drejtorinë e administrimit të tokave, Kreshnik Mino për “falsifikim të dokumenteve të pronësisë”.
