Kryesore

“Falsifikimet”/Patozi: Janë tërbuar nga dëshpërimi

               Publikuar në : 13:34 - 21/05/19 M. S

Pas lajmit se një kandidat i Bindjes Demokratike në Bashkinë e Kavajës, është tërhequr nga zgjedhjet e 30 qershorit, një reagim është përcjellë nga ana e Astrit Patozit.

Në shkrimin e tij të radhës, të ndarë me ndjekësit në Facebook, ai nënvizon që në krye të herës se nuk kanë për ti ndalur. Patozi e krahason këtë sulm nga ata që janë tërbuar nga dëshpërimi.

Po kështu, koordinatori i Bindjes Demokratike thotë mes rrjeshtave se s’ka ndodhur më parë që një parti politike të sulmohet dhe të merret peng që nga firmëtarët, e deri tek kandidatët e saj për zgjedhjet e 30 qershorit.

Statusi

NUK NA NDALIN DOT, NDAJ JANË TËRBUAR NGA DËSHPËRIMI

Krenarë për atë që kemi bërë në kaq pak ditë dhe mirënjohës për gjithkënd që mbështeti dhe besoi tek BINDJA DEMOKRATIKE. Sot jemi realisht shumë më tepër dhe shumë më të fortë se në ditën e parë. Asnjë peng për ata që u ndanë prej nesh për shkak se u kapën për fyti dhe u lidhën prej këmbësh nga të dëshpëruarit e sistemit, të cilët ndjehen tmerrësisht të kërcënuar nga era e BINDJES DEMOKRATIKE.
Shikojeni vetë si janë shpërfytyruar, sa kanë nisur me tërbim një fushatë të egër kundër nesh, që të kujton gjuetinë e nazistëve ndaj ebrenjve, para dhe gjatë Luftës së Dytë Botërore.  Kurrë më parë nuk ka ndodhur që një partie politike, ndonëse fare e re, t’i sulmohen, përgjohen dhe merren peng, që nga firmëtarët e deri tek kandidatët e saj për zgjedhjet e 30 qershorit. Është e pashembullt kjo që po ndodh, por ajo konfirmon gjithashtu se ne kemi bërë gjënë e duhur në kohën e duhur.

E kanë kot. Sepse nuk na ndalin dot, ndaj edhe janë kaq të acaruar.  Nuk ia vlen të merreni me inkuizitorët, ndonëse i njohim me emra, ua dimë edhe zyrat ku i kanë thirrur të penduarit, në prani të dëshmitarëve mediatikë.  Sepse koha e tyre po skadon me shpejtësi. Është koha e BINDJES DEMOKRATIKE.

Pak më herët, Bledar Sinella, kandidat i Bindjes Demokratike në Bashkinë e Kavajës, u tërhoq nga zgjedhjet e 30 qershorit. Ai ka dorëzuar në KQZ kërkesën për çregjistrim. Në një letër drejtuar Komisionit Qendror të Zgjedhjeve, Sinella thotë se i kanë falsifikuar firmën, ndonëse e pranon se është kontaktuar nga përfaqësues të Bindjes Demokratike.

“Nuk është firma ime”/ Kandidati i BD-së për Kavajën nxjerr blof Patozin

 

 

Kthehu
WhatsApp Denonco ne TT