Ish-kryeministri, Sali Berisha i është përgjigjur liderit historit të PS, Fatos Nanos, pas akuzave dhe sulmeve që ky i fundit i drejtoi gjatë një interviste në emisionin ”Opinion”.
Berisha zgjodhi një mënyrë ironizuese, pasi publikoi një video në rrjetet sociale ku vetë Nano sulmonte Edi Ramën, teksa ky i fundit asokohe kërkonte të merrte drejtimin e Partisë Socialiste.
”Edi Rama ka një problem moral, e kam marrë me thonjë të paprerë refugjat nga Parisi për të bërë pjesë në ekipet tona qeverisëse dhe përfaqësuese. Mund të kem bërë shumë gjëra, por e nxora nga bataku i fyerjeve, nga refugjat dhe shitës ikonash të vjedhura në kohën e Saliut, në Ministër dhe kryetar të Bashkisë më të madhe të Shqipërisë”, thoshte Nano dikur.
Ndërkohë, Sali Berisha krahas videos shkruan me ironi ”Miq, fajin e ka Saliu”.
Ditën e djeshme, Nano deklaroi se Berisha ishte lider konfliktual, kafshë politike dhe se pa të, Shqipëria do ishte më e zhvilluar. Madje, Nano theksoi edhe se nuk është penduar që futi në politikë dhe i dhe krahë Ramës.
