Policia e Shtetit ka dalë me një deklaratë për shtyp lidhur me një sasi të madhe eurosh të padeklaruara që u sekuestruan mesditën e sotme në Portin e Durrësit.
Sasia e eurove u sekuestrua në mjetin kamion tip “Renault” që drejtohej nga 56-vjeçari Andon Thanasi, i cili u arrestua në kushtet e flagrancës, bëjnë me dije uniformat blu.
Pas verifikimeve rezultoi se sasia e eurove të gjetura të fshehura në kamion ishin 498.850 ndonëse burimet raportuan më herët për më shumë.
Policia njofton se i gjithë procesi i numërimit të eurove është filmuar me kamera.
Ndërkohë specialistët për Hetimin e Krimit Ekonomik e Financiar në DVP Durrës, po vazhdojnë hetimet për zbardhjen e plotë të kësaj ngjarje.
