Kombëtarja Shpresa do të përballet ditën e sotme me Sllovakinë, në orën 17:20 në “Selman Stërmasi”. Kuqezinjtë vijnë në këtë sfidë pas dy barazimeve të padrejta dhe sot kërkojnë me çdo kusht fitoren që u jep të drejtën të shpresojnë për një biletë në Europianin 2019. FSHF ka kërkuar që të ketë sa më shumë tifozë në mbështetje të skuadrës në një ndeshje kaq të rëndësishme dhe dyert e stadiumit janë të hapura për tifozët.
Sllovakia dhe kuqezinjtë e Alban Bushit kanë grumbulluar nga 6 pikë secila dhe janë për tu përballu në dy sfida së bashku për të arritur vendin e dytë pas Spanjës, që siguron pjesëmarrjen në këtë kompeticion.
Shqipëria do të ketë mungesa në këtë ndeshje pasi Kristal Abazaj dhe Ylber Ramadani janë grumbulluar nga kombëtarja e madhe për miqësoren ndaj Norvegjisë, ndërkohë që të dëmtuar janë portieri Selmani, mesfushori Qazim Laçi apo edhe sulmuesi Fiorin Durmishaj.
Bushi ka grumbulluar disa elementë të rinj dhe shumë lojtarë që luajnë në Kategorinë Superiore ndërkohë që ka rikthyer dy sulmuesit Rey Manaj e Taulant Seferi nga të cilët pret shumë në sfidën e sotme por edhe në atë të pas disa ditëve në transfertë ndaj Sllovakisë. Një fitore në këtë sfidë do ta ngjiste Shqipërinë U-21 në vendin e tretë me kuqezinjtë që do të ruanin gjallë shpresat për ta mbyllur grupin të 2-ët.
