Shefja e Survejancës dhe Shërbimit të Inteligjencës Epidemike në ISHP, Eugena Tomini, në një intervistë në studion e “Dita jonë” në A2, shprehu shqetësimin për rritjen e numrit të personave të shtruar në spital me COVID. Në terapi intensive janë 10 persona. Në total janë 78 të shtruar, një numër relativisht i lartë.
“Kemi 10 raste në terapi intensive, që është një numër i lartë. Gjithsej, kemi 78 të shtruar, që përkon me një situatë që ne e konsideronim pikun në mars. Është zgjeruar edhe grupmosha e të shtruarve, sot janë të shtruar edhe persona të moshës 30-40 vjeç”, theksoi Tomini.
Ajo sqaroi se rritja e numrit të testimeve, ka lidhje me zgjerimin e kontakteve gjatë 24 orëve. Ndër të tjera ripërsëriti apelin për ndërgjegjësimin nga popullata. Sikundër mjekët e tjerë, ajo kërkoi që të respektohej distancimi fizik, dhe nëse keni simptoma duhet vetëizolimi.
“Në kohën e karantinës kishim kontakte minimale dhe kjo reflektohej në testimet e atyre javëve. Sot, kontaktet janë më të shumta dhe të zgjatura në kohë dhe rrjedhimisht janë rritur edhe testimet”, u shpreh Tomini.
“Duhet ndërgjegjësim nga e gjithë popullata. Çdo person i rezultuar pozitiv, edhe pse pa simptoma, përbën rrezik për familjarët dhe të gjithë kontaktet e tij. Duhet ndjekur karantinimi dhe distancimi fizik. Gjithashtu, në ambiente të mbyllura, duhet mbajtur maskë”, nënvizoi Tomini.
