Kreu i Shtetit, Ilir Meta, ka ndarë me qytetarët shqetësimin për mbylljen e shkollave, dhe shpopullimin e vendit, për shkak të largimeve masive të shqiptarëve. Ai vë në dukje me anë të një statusi në Facebook se çdo vit që kalon, shkollat po përballen me sfidën e uljes së numrit të nxënësve.
Ndodhur në këto kushte, presidenti apelon që të reflektojmë, “për t’i dhënë fund antagonizmit të paprinciptë politik që ka sjellë një erozion të tmerrshëm social, jo vetëm vlerash dhe besimi”. Meta e mbyll me një mesazh të qartë, se zgjidhja nuk është largimi, por ndryshimi.
Statusi
Të dashur miq,
Nisja e vitit të ri shkollor është një ngjarje e gëzueshme për shoqërinë tonë. Shumë urime pati dje. Por nga sot duhet të reflektojmë për tkurrjen dramatike të popullsisë, që po ndikon drejtpërsëdrejti edhe në sektorin e arsimit.
Çdo vit që kalon shkollat po përballen me sfidën e uljes së numrit të nxënësve.
Është koha të mendojmë seriozisht për të ardhmen tonë, për t’i dhënë fund antagonizmit të paprinciptë politik që ka sjellë një erozion të tmerrshëm social, jo vetëm vlerash dhe besimi.
Ju ftoj të ndiqni këtë kronikë për të kuptuar më qartë se ç’po ndodh në Shqipëri dhe se kujt i intereson një Shqipëri pa shqiptarë.
Zgjidhja nuk është largimi por NDRYSHIMI!
