Vëllai i Admir Muratajt, Aleksandër Murataj ka folur nga burgu, ku ka denoncuar faktin se po e pengojnë të marrë pjesë në varrimin e të vëllait.
Në një lidhje të drejtpërdrejtë telefonike me Report TV, Murataj tha se po e mbajnë në burg prej 2 vitesh pa asnjë arsye, si dhe nuk është pyetur nga prokurori asnjëherë të vetme.
“Më kanë burgos sepse jam vëllai i Admir Muratajt. Një orë pas grabitjes së bërë para 2 vitesh, kam shkuar në shtëpinë e vëllait tim. Vetëm për këtë arsye më mbajnë në burg, unë s’kam kryer as grabitje as asgjë. Më mbajnë në burg pse shkova në shtëpinë e tim vëllai. Kam dy vjet në burg, por as 10 minuta gjatë këtyre viteve nuk e kam parë prokurorin. S’jam marrë në pyetje njëherë të vetme. E imagjinon pak çfarë drejtësie kemi ne?”, tha i indinjuar Muarataj.
Më tej, ai akuzoi median për publikimin e pamjeve të rënda, por edhe për spekulime, duke hedhur poshtë lajmet se në shtëpinë e tyre ka kamera me vlerë 300 mijë euro.
“Ai është djalë nëne, ata që e nxjerrin fotografitë duhet me e llogarit. Si mund t’i nxjerrësh ato pamje, ka familje, është djalë nëne. Po të ishin familjarët e tyre do i nxirrnin? Bëjnë spekulime për kamera 300 mijë euro, shkoni vetë dhe bëni konstatime. Ku ka kamera 300 mijë euro?
Unë kam jetu 23 vite në emigracion, as Amerika, as Shtëpia e Bardhë nuk i ka 300 mijë euro kamera sigurie. Shkoni te shtëpia dhe verifikojeni vetë si media, jo me publiku spekulime pa lidhje.”
Po ashtu, Aleksandër Murataj tha se vëllain e tij e kishin çuar aty, pasi nëse do ishte ai organizatori, nuk do ishte vrarë, si dhe u shpreh se policia mund të kishte dhënë urdhër ndalimi për të dhe të shmangte vrasjen:
“Policia mund të kishte dhanë urdhër ndalimi, jo me e vra direkt. Dikush e ka çu atje, po të ishte organizatori, nuk do ishte vra. Hajde këtu në burg të ta sqaroj të gjithë të vërtetën, po bëjnë spekulime. Të drejtën e ballafaqoj me fakte. Drejtoria e Burgjeve më pengon të shkoj në varrimin e vëllait tim, t’i jap lamtumirën e fundit”, tha ndër të tjera Murataj./ Tirana Today
