Presidenti i Turqisë Erdogan, i pranishëm në ceremoninë e inaugurimit të 522 banesave të reja në qytetin e Laçit që u ndërtuan pas tërmetit të 26 nëntorit 2019, tha kanë kushtuar 42 milionë euro, teksa ka uruar përfituesit që ti gëzojnë. Gjatë fjalës së tij, ai theksoi miqësinë mes Shqipërisë dhe Turqisë, duke i cilësuar si vëllazërore.
Presidenti turk tha se ‘Vëllai i qëndron pranë vëllait kur ka nevojë, dhe jo kur thirret’. Pas tërmetit tragjik, Turqia u vu menjëherë në lëvizje, duke dërguar në Shqipëri të gjitha pajisjet e nevojshme të ndihmës së shpejtë, dhe ekipe teknike nëpërmjet ambasadës.
“Ju kam sjellë këtu të gjithë dashurinë e miliona zemrave dhe përshëndetjet e përzemërta të popullit të Turqisë. Ju kam sjellë edhe përshëndetjet e vëllezërve dhe miqve tuaj në Shqipëri. Nga këtu nëpërmjet jush dua të përcjell përshëndetjet e kombit tim të nderuar për mbarë Shqipërinë.
Dua të theksoj faktin se jam shumë i lumtur që ndodhem këtu bashkë me ju, me rastin e kësaj ceremonie dhe që jam bërë pjesë e këtyre emocioneve.
Gëzimi i Shqipërisë është gëzim ynë, dhe hidhërimi i Shqipërisë është hidhërimi ynë. Kështu që mirëqenien dhe paqen tuaj e konsiderojmë të njëjtë si tonën. Duke qenë si një popull i një vendi që ka përjetuar dhimbje të ngjashme shumë herë më përpara, tërmetet në Shqipëri na lënduan zemrat tona.
Menjëherë jemi vënë në lëvizje për të ndarë dhimbjen e njerëzve të zonës. Ne si shtet duke u mobilizuar ju erdhëm në ndihmë. Vëllai i qëndron pranë vëllait kur ka nevojë, dhe jo kur thirret. Pas tërmetit, ne menjëherë kemi dërguar në Shqipëri të gjitha pajisjet e nevojshme të ndihmës së shpejtë dhe ekipe teknike nëpërmjet ambasadës. Duke qenë në kontakt me mikun tim, me kryeministrin Edi Rama, kemi bërë të mundur ndjekjen nga afër të gjithë këtyre punimeve që sapo kishin filluar. Unë personalisht jam aktivizuar dhe morëm iniciativa që përgjatë këtij procesi për ti ardhur në ndihmë Shqipërisë, filliuam kontaktet me komunitetin ndërkombëtar dhe organizatën e bashkëpunimit islamike”.
