Presidenti i Turqisë mbërriti mbrëmë në Beograd, i shoqëruar nga bashkëshortja e tij Emine dhe një grup prej 185 biznesmenësh.
Erdogan u prit në aeroportin “Nikolla Tesla” nga homologu i tij serb Aleksandër Vuçiç në një ceremoni mjaft pompoze.
Ashtu siç ishte njoftuar, Erdogan u prit nën masa të rrepta sigurie, teksa ruhej nga 50 truproja, ndërsa gjysma e Beogradit është “paralizuar” si pasojë e masave të larta të sigurisë.
Madje, mediet turke e kanë cilësuar vizitën e Erdogan të ngjashme me atë të presidentit rus Vladimir Putin për sa i përket masa të marra.
Në një intervistë për “Politika”, Rexhep Tajip Erdogan kërkoi nga Serbia që të luajë një rol prominent për paqen në rajon:
“Turqia dhe Serbia janë dy vende kyçe në Ballkan. Ashtu si Turqia e shfrytëzon pozitën e saj gjeografike për paqen dhe stabilitetin, duhet që edhe Serbia e cila ka një strukturë multi-etnike, multikulturore dhe dinamike, të hapë rrugën e paqes për rajonin”.
Gjithashtu, presidenti turk e pranoi se mes dy vendeve ka dallime të qarta, por tha se ato nuk duhet të ndikojnë në përmirësimin e marrëdhënieve.
“Ne nuk i shohim dallimet si pengesa për bashkëpunim, po përpiqemi të vazhdojmë marrëdhëniet tona dypalëshe nëpërmjet një qasje konstruktive dhe një dialogu të sinqertë.
Turqia po ndjek me kujdes dhe me interes reformat ekonomike që Serbia ka zbatuar me sukses në vitet e fundit. Ne jemi duke punuar që të japim mbështetje për miqtë tanë serbë në iniciativën e tyre të zhvillimit ekonomik”, deklaroi më tej në intervistë Erdogan.
Pritet që marrëveshja e parë që do të nënshkruhet mes dy vendeve është ajo e heqjes së vizave, teksa serbët janë të vetmit shtetas në rajon që udhëtojnë me viza drejt Turqisë.
