Presidenti i Turqisë, Recep Tayyip Erdoğan, është shprehur nëse marrëveshja e arritur midis Turqisë dhe SHBA-së nuk zbatohet, ushtria turke do ta vazhdojë operacionin “Burimi i Paqes” dhe do të shënjestrojë elementet terroriste në veri të Sirisë, pas afatit 120-orësh.
“Nëse nuk realizohet, në momentin e përfundimit të afatit 120-orësh ne do ta vazhdojmë operacionin aty ku ka mbetur dhe do të vazhdojmë t’i shtypim terroristët”, tha Erdoğan në një ceremoni inaugurimi në Kayseri.
Sipas Anadolu Agency (AA), Erdoğan theksoi se qëndrimi i Turqisë në krijimin e zonës së sigurt në veri të Sirisë ka qenë gjithmonë i njëjtë dhe nuk ka ndryshuar. Ai deklaroi se forca të regjimit sirian janë të pranishme në disa pjesë të zonës së operacionit turk në Sirinë veriore.
“Këtë çështje do ta diskutoj me Putin”, shtoi presidenti turk.
Erdoğan po ashtu foli edhe në lidhje deklaratat kundër Turqisë pas nisjes së operacionit “Burimi i Paqes”.
“Fatkeqësisht, në nëntë ditët e fundit, është bërë çdo lloj shëmtire kundër Turqisë. Pasi ranë maskat nga fytyrat e tyre, ne pamë se kush çfarë është”, tha Erdoğan.
