Me rastin e Ditës së Drejtave të Njeriut, presidenti turk Recep Tayyip Erdogan ka dënuar dhënien e çmimit Nobel shkrimtarit Peter Handke. Ky i fundit njihet si mbështetës i politikave shoviniste të ish-udhëheqësit serb Milosheviç.
Sipas Erdogan, po shpërblehet dikush që mbështet shkeljen e të drejtave të njeriut. “Dhënia e çmimit Nobel në Letërsi një personi racist nuk do të thotë asgjë tjetër përveç se shpërblim për shkeljen e të drejtave të njeriut”, tha Erdogan.
Handke njihet si një admirues i madh i Milosheviçit, i cili vdiq në vitin 2006 në gjykatën ndërkombëtare në Hagë teksa po gjykohej për krime lufte dhe gjenocid.
“Ngrihuni në këmbë nëse i mbështesni serbët”, kishte shkruar Handke gjatë luftës në Kosovë në vitet 1998-1999. Ai po ashtu është mohues i gjenocidit serb gjatë luftës së Bosnjës. Handke gjithashtu kishte vizituar Milosheviçin në burg dhe ishte përpjekur të dëshmonte në favor të tij. Me fitimin e çmimit Nobel, Handke do të marrë 952 000 dollarë, si dhe një medalje e një diplomë.
