Një 28-vjeçar shqiptar është ekstraduar nga Italia, pasi ishte shpallur në kërkim ndërkombëtar për vrasje. Sipas policisë, i arrestuari kishte vrarë në vitin 2015 pronarin e një autolavazhi, së bashku me dy persona të tjerë.
Ngjarja e rëndë ka ndodhur më 10 korrik 2015, ku 28-vjeçari me personat e tjerë kishin dhunuar pronarin e një autolavazhi në Sarandë me shkop bejsbolli dhe tytën e pistoletës, dhe më pas e kishin qëlluar për vdekje me plumba.
BalkanWeb raporton se autori është Kejvi Hysa, 28 vjeç, lindur në Kurbin.
Njoftimi i policisë:
Rinas
Ekstradohet nga Interpol Tirana një tjetër shtetas i shpallur në kërkim ndërkombëtar për Vrasje
U krye ekstradimi nga Milano/Itali drejt vendit tonë i shtetasit shqiptar K. H., 28 vjeç, lindur në Kurbin.
Shtetasi K. H. ishte shpallur në kërkim pasi Gjykata e Rrethit Gjyqësor Sarandë, në vitin 2015 ka caktuar masën e sigurisë “Arrest në burg” për veprën penale “Vrasje me paramendim e kryer në bashkëpunim”.
Më datë 10 korrik 2015, rreth 02:00, në Sarandë, si rezultat i një mosmarrëveshjeje për motive të dobëta mes pronarit të një autolavazhi makinash, shtetasit E. M., me shtetasit G. H., E. H. dhe K. H, këta të fundit e goditën me shkop bejsbolli dhe me tytën e pistoletës. Pas kësaj një nga autorët iu afrua dhe qëlloi në drejtim të shtetasit E. M., i cili gjeti vdekjen e menjëhershme.
Si rezultat i bashkëpunimit të Interpol Tirana me Interpol Romën, u bë i mundur arrestimi i tij në Itali dhe ekstradimi drejt vendit tonë.
