Dy shqiptarët Aris Dema dhe Edjol Cani, ka pranuar akuzat për furnizimin me kokainë të zonave të Brighton dhe Hove, në Britani. Zyrtarët e njësisë së krimit të organizuar i kanë arrestuar ata të dy në dhjetor të vitit 2016, duke shpallur në kërkim edhe dy shqiptarë të tjerë të cilët janë: Orges Dema dhe Olsi Fizlaj.
Policia beson se Orges Dema mund të jetë kthyer në Shqipëri, ndërsa për Fizlaj mendon se ende nuk është larguar nga Britania. Kapje e tyre në vitin 2016, erdhi pas një mbikëqyrje të gjatë, dhe shqiptarët akuzohen për drogë dhe trafikim armësh.
Por, tashmë Edjol Cani dhe Aris Dema pranuan krimet e tyre dhe u dënuan të enjten e javës së kaluar. Dema, i cili qëndronte në vilat Albany në Hove, pranoi se ka furnizuar këtë zonë me kokainë. 28-vjeçari i papunë u dërgua në burg, dhe është dënuar me 3-vjet.
Ndërkohë, Cani, i cili qëndronte në Church Street në Brighton, gjithashtu pranoi akuzën, se furnizonte me kokainë zonën ku jetonte dhe se atij gjatë arrestimit iu gjet edhe një armë zjarri.
23-vjeçari u dënua me 3-vjet për akuzat e drogës dhe 18 muaj për posedimin e armës. Por, Orges Dema dhe Olsi Fizzlaj nuk i janë përgjigjur thirrjeve të policisë të bëra në shtator të vitit 2017 për t’u dorëzuar, kështu që policia ka apeluar për t’i gjetur ato.
Policia britanike ka dhënë detaje të hollësishme duke përshkruar pamjen fizike të tyre dhe ka apeluar që të gjithë ata që mund të bien me ta në kontakt të njoftojnë autoritetet.
Burimi: theargus.co.uk
Përshtati: Tirana Today
