Një operacion i policisë greke i zhvilluar gjatë 24 orëve të fundit, ka bërë të mundur shkatërrimin e një organizate kriminale shqiptare.
Sipas mediave grek, operacioni u zhvillua në zonën e Korinthit, teksa banda në fjalë akuzohej për grabitje të mëdha. Operacioni filloi në zonën e Kalamatës dhe u konkretizua në zonën e Korintit, ku pati edhe përplasje me armë zjarri mes policisë dhe shqiptarëve.
Gjatë kësaj përplasjeje, mbetën të plagosur dy shtetas shqiptarë, ndërsa një person i tretë u arrestua pas disa minutash ndjekje në kodrat e zonës Akro Corinth. Gjatë operacionit janë arrestuar shqiptarët: Eljon Deraj, Andrea Caushaj dhe Amarildo Caushaj. Ndërkohë janë shpallur në kërkim nga policia greke Arsen Bajrami dhe Ernest Mustaj.
Në automjetin e tyre u gjetën kallashnikov dhe pistoleta, si dhe mjete të përdorura për maskim si kapuç dhe paruke. Në cilësinë e provës materiale u sekuestruan thika, leva, si dhe gërshërë për prerje të metaleve.
Ndërkohë, një tjetër çift shqiptar është arrestuar sot në zonën e Prevezës të cilët dyshohet se kanë marrë makina me qira që më pas janë përdorur për vjedhje nga grupi shqiptar. Policia Greke thotë se banda kreu disa vjedhje bankash dhe dhjetëra vjedhje dyqanesh në zonën e Peloponezit dhe Epirit.
Metodat e përdorura prej tyre konsiderohen jashtëzakonisht të ashpra. Ata kërcënuan dhe frikësuan viktimat e tyre, dhe janë përgjegjës për disa grabitje të dhunshme që rezultojnë me lëndime të viktimave.
