Kryeministri i Kosovës, Albin Kurti, ka emëruar Rifat Latifin, Ministër të Shëndetësisë. Në një konferencë për mediat, Kurti tha se Latifi ka ardhur nga SHBA-ja, për të marrë detyrën e të parit në dikasterin e shëndetësisë. Sakaq, ministri Rifat Latifi premtoi se do të angazhohet, për të rritur standardet jetësore. Po kështu tha se do të bëjnë çështë e mundur për të ndërprerë largimin e trurit mjekësor në vendet e tjera.
“Është nder i madh dhe besim për mua. Premtoj që do angazhohem më tërë qenien që në mënyrë afatgjatë, të ngrisim standardet jetësore. Do investojmë në ngritjen e kualiteteve të shërbimeve. Ne do e ndërpresim largimin e trurit mjekësor në vendet tjera. Kur e ndreqim shtëpinë tonë, do kontribuojmë në rikthimin e trurit të larguar, për të ndihmuar Kosovën dhe shkencat mjekësore të Kosovës.
Me kthimin e trurit, do e ndërpresim edhe largimin e pacientëve të Kosovës në spitalet jashtë vendit. Pacientët tonë do rrinë në shtëpinë tonë, sepse ne kemi ekspertë. Ne do fillojmë më strategji afagjatë, 20-30 vjeçare. Me këtë platformë afagjatë, rezultatet nuk do shihen brenda ditës apo natës”.
Latifi njihet si kirurg i famshëm në SHBA, ku jeton e punon prej shumë vitesh. Ai është themelues i Kongresit të Parë Klinik, i organizuar nga Kolegji i Kirurgëve të Kosovës.
