Gazetari Artan Hoxha ka folur për sekuestrimin e 670 kg kokainë nga policia braziliane, ndërsa çdo pako e lëndës narkotike mbante logon e klubit të Elbasanit.
Sipas mediave të huaja, lënda narkotike ishte fshehur në trupin e një kamioni. Shoferi i kamionit i konfirmoi policisë se kishte marrë 10 mijë dollarë për të transportuar ngarkesën që kishte si destinacion Evropën.
Në një intervistë dhënë për “Abcnews”, Hoxha u shpreh se kemi të bëjmë me grupe kriminale që kanë para pa fund. Sipas tij, ata mund të sigurojnë vrasës me pagesë dhe armë pa asnjë problem.
“670 kg në kokainë u kapën Brazil me logon e Elbasanit. Ishte një rrugë tjetër nga ajo që sjell kokainën në Shqipëri. Dyshimet të çojnë që kemi të bëjmë me një njëjtin grup. Ajo ngarkesë nuk do të vinte në Shqipëri, por do të shkonte në Belgjike”, deklaroi gazetari.
Sa i përket atentateve mafioze të kryera në Elbasan, Artan Hoxha tha se ende nuk dihen kush janë vrasësit e gjashtë personave.
“Ne e dimë për shembull cili grup është në Vlorë dhe kush vret, kush është në konflikt në Shkodër dhe kush vret, po ashtu edhe në Lushnje. Në Elbasan nuk dihet ende se kush janë këta ekzekutorë që ka vrarë katër atentate duke vrarë gjashtë njerëz dhe të mos zbulohet. Kush na sugjeron që nuk do të ketë vrasje të tjera”, tha Hoxha.
