Në një aktivitet në Tiranë, gjenerali amerikan Michael Barbero deklaroi sot se vrasja e gjeneralit të Iranit, Qasem Soleimani, ishte mjaft e rëndësishme. Ai tha më tej se të gjitha sulmet e dhunshme që vinin nga shiitët, ishin të orkestruara nga Soleimani. Po kështu, 700 ushtarë amerikanë kanë vdekur nga këto armë, si rezultat i drejtimit të Qasem Soleimanit.
“Sulmi për të vrarë Qasem Soleimanin, ishte mjaft i rëndësishëm. Më i rëndësishëm se vrasja e Osama bin Laden apo Abu bakr al-Baghdadi. Ai ishte arkitekti i çfarëdo lloj paqëndrueshmërie.
As Hezbollah nuk do të sulmonte Izraelin, nëse ai nuk do të jepte urdhrin e tij. Të gjitha sulmet e dhunshme që vinin nga shiitët, ishin të udhëhequr nga Soleimani. 700 ushtarë amerikanë kanë vdekur nga këto armë, që janë si rezultat i drejtimit të Qasem Soleimanit. E kaluara e tij e bëri që të përcaktohej si një terrorist.
Meqenëse ai ishte një kriminel ndërkombëtar, ai ka shkaktuar vdekjen e shumë personave të pafajshëm në atë rajon, në 15 vitet e fundit. Ishte tërësisht e justifikuar dhe ne do ti përballojmë vetë pasojat. Ai trajnonte të gjithë forcat paraushtarake”, u shpreh ai.
Gjenerali garantoi se s’ka rrezik për konflikt global. Duke qëndruar në të njëjtën linjë, ai shtoi se NATO do të reagojë ndaj çdo sulmi që mund ti bëhet ndonjë vendi anëtar.
“Nuk mendoj se ka një konflikt global në horizont. NATO duhet të intensifikojë mbështetjen e operacioneve në Irak. NATO është një aleancë që vazhdon të jetë e rëndësishme, dhe vepron në mënyrë të përshtatshme. Mendoj që NATO do të reagojë ndaj çfarëdo lloj sulmi do ti bëhet ndonjë prej shteteve anëtare të saj”.
