Pista kryesore ku aktualisht po hetohet në lidhje me ekzekutimin e Hekuran Billës, mbetet hakmarrja. Në kërkim është shpallur Viktor Marku, vëllai i Prel Marku, i vrarë nga Hekuran Billa në vitin 2006 në Angli, për të cilën ishte dënuar me burg.
Burime nga grupi hetimor bëjnë me dije se përveç Viktor Markut, po hetojnë edhe të afërm dhe shokë të tij, që mund ta kenë ndihmuar për të kryer vrasjen. Nga pamjet e kamerave të sigurisë duket se në makinën ‘Benz’ që kreu atentatin, ishin dy persona.
Nga hetimet që janë kryer në këtë drejtim, deri tani policia thotë se ka dyshime që 3 persona kanë marrë pjesë në këtë vrasje, si dhe mund të jetë përdorur një automjet i tretë për largimin e autorëve pasi dogjën makinën.
Dy persona të tjerë që dyshohen si të përfshirë në vrasje, gjithashtu nuk janë gjetur nga policia. Ata janë të njohur të Viktor Markut.
Hekullan Billa u ekzekutua rreth orën 22:00 të së premtes te ‘Komuna e Parisit’, pranë qendrës tregtare ‘Kristal’. Fillimisht nga banorët u raportua si aksident për shkak se nuk pati të shtëna me armë dhe viktima në tentativë për t’iu shpëtuar atentatorëve, manovroi me makinën e tij tip BMW X6 duke u përplasur me dy makina të parkuara. Atentatori u largua me shpejtësi nga vendi i ngjarjes, ku pak minuta më vonë në Pezë të Vogël, u gjet dhe makina e djegur që përdorën autorët për t’u larguar.
