Biznesmeni Çajup Selimi, 52-vjeç, u vra mbrëmjen e djeshme në derë të shtëpisë në lagjen “15 shtatori”. Ai u qëllua dy herë, ku një plumb e kapi në zemër, duke rezultuar fatal për 52-vjeçarin. Për fat të keq, ai ndërroi jetë në Spitalin Rajonal të Gjirokastrës.
Dinamika e ngjarjes/ Autori kishte thërritur viktimën
Çajup Selimi ndodhej në banesën e tij në një pallat në lagjen “15 shtatori” në Tepelenë, kur është thirrur nga një person në katin e parë për të zbritur poshtë. 52-vjeçari ka dalë nga banesa për të shkuar poshtë, ndërsa një person tjetër po e priste me armë në katin e dytë, duke e qëlluar 2 herë me pistoletë. Ka dyshime të forta se viktima njihej me personin që e ka thirrur, dhe ka vajtur për ta takuar poshtë pallatit.
Viktima, pronar i një biznesi në Tepelenë
Selimi rezulton pronar i një biznesi në qytet, ndërsa më parë ka qenë i përfshirë edhe në disa konflikte për çështje konkurrence. Ai tregtonte miell, materiale ndërtimi dhe artikuj të tjerë të ndryshëm. Në vitin 2018, Selimi u konfliktua me dy persona, të cilët e goditën atë me mjete të forta. Në atë kohë, familjarë të Çajupit patën deklaruar se ai ishte sulmuar edhe 4 herë të tjera. Për ngjarjen në vitin 2018 u ndalua Risiano Abedini, po nga Tepelena. Familja Selimi dhe Abedini menaxhojnë biznese me profil të ngjashëm, por nuk dihet ende nëse ngjarja ka lidhje me konkurrencën në biznes.
Policia shoqëron një person
Deri më tani, Policia e Shtetit ka shoqëruar një person që mendohet se ka pasur konflikt me viktimën, para vrasjes së tij. Pista kryesore për vrasjen e 45-vjeçarit vijon të jetë ajo e konkurrencës me biznesmenët e tjerë në zonë.
Ja çfarë njoftonte më herët policia
Policia e Shtetit ka reaguar pas vrasjes së biznesmenit Çajup Selimi në Tepelenë. “Rreth orës 21:15 në qytetin Tepelenës, në lagjen “15 shtatori”, në rrethana ende të paqarta është plagosur me armë zjarri shtetasi Ç.S., rreth 45 vjeç, i cili ka humbur jetën në Spitalin Rajonal Gjirokastër, si pasojë e plagëve të marra. Menjëherë shërbimet e Komisariatit të Policisë Tepelenë dhe Forcat Shqiponja të DVP Gjirokastër, kanë shkuar në vendngjarje dhe po krehin zonën për kapjen e autorit. Ndërkohë janë ngritur disa pika kontrolli në hyrje dhe dalje të qytetit Tepelenë. Grupi hetimor nën drejtimin e Prokurorisë ndodhet në vendngjarje, dhe po punon për identifikimin dhe kapjen e autorit/ve”, njofton policia.
