Kategoria e Dytë ka sjellë rilindjen e ekipit të Elbasanit. Një ecuri mjaft e mirë në fazën e parë duke mos regjistruar asnjë humbje, e konfirmon faktin që Elbasani por rikthehet. Por tani duhet të ruajnë këtë njëjtin nivel edhe në fazën e dytë, pasi është më e vështirë dhe nuk ti fal askush pikët. Megjithatë, verdhebluve u jep shpresë ecuria e deritanishme, pasi kanë qenë të pamposhtur dhe kjo nuk është edhe aq e lehtë sa mendohet në Kategorinë e Dytë. Thuhet kështu, pasi transfertat janë gjithnjë shumë të vështira, por verdheblutë ia kanë arritur gjithsesi të dalin me kokën lart.
KRAHASIMI
Duket i tepërt krahasimi që do të bëjmë më poshtë, por gjithsesi shifrat janë shifra dhe ato janë “kokë- forte” në të tilla raste. Tanimë është një fakt që Elbasani është e vetmja skuadër shqiptare pa pësuar asnjë humbje në kampionat për këtë sezon që militon në Kategorinë e Dytë dhe sigurisht që mund të konsiderohet një sukses jo i vogël.
Por, nëse u shkojmë më larg statistikave, verdheblutë qëndrojnë përkrah gjigantëve botërorë si Barcelona apo Mançester Siti, të cilat gjithashtu nuk njohin asnjë humbje deri më tani në kampionatet e tyre.
Edhe në qytet janë vetë tifozët që bëjnë shpesh batuta me njëri-tjetrin, duke e vënë Elbasanin përkrah këtyre klubeve të mëdha, ndonëse e kuptojnë mjaft mirë që kjo skuadër nuk ka asnjë lidhje me këto ekipe europiane. Gjithsesi, edhe pse është çmenduri të krahasosh nivelin e Kategorisë së Dytë me La Ligan apo Premier Ligën, mund të thuhet se për këtë kategori dhe përballë skuadrave ku elbasanasit mund të marrin pjesë është një “Barcelonë”.
Përpos krahasimeve, për Elbasanin është e rëndësishme që të vijojë me këtë ecuri pozitive edhe pas pushimeve, pasi, nëse vijon me këtë rrugë, edhe ngjitja në Kategorinë e Parë do të jetë më e mundur. Për këtë arsye, drejtuesit kanë menduar që të bëjnë përforcime në merkaton e janarit dhe emrat e parë kanë filluar të dalin në skenë rreth klubit, por ende nuk ka zyrtarizime.
Por, pozitiv është fakti se lojtarë të ndryshëm kanë shprehur dëshirën e tyre për të qenë pjesë e skuadrës në rast se do të kenë financa të sigurta, pasi kemi të bëjmë me një ekip me histori të madhe.(p.sport;Vladimir Mema)
