Përplasja midis grupeve të rrezikshme me policinë duket se fsheh edhe më shumë nga vetë ngjarja e ndodhur pak ditë më parë në Elbasan. Madje policia i frikësohet këtyre grupeve, duke refuzuar të mbajë nën përgjim një person tejet të rrezikshëm. Sipas një dokumenti të publikuar në emisionin “Opinion”, evidentohet edhe përgjigja e uniformave blu pas kërkesës për mbajtje nën përgjim ambiental të një personi me rrezikshmëri të lartë.
Një kopje e kësaj përgjigje i është dërguar prokurorisë së Elbasanit, ku theksohet se është e pamundur kryerja e veprimeve të mëtejshme për të mbajtur nën përgjim personin në fjalë, emri i të cilit nuk u bë publik në emision.
“…ju informojmë se nga ana e sektorit të Forcës së Posaçme, nisur nga dinamika e madhe me shërbime në funksion të procedimeve penale në ndjekje dhe të numrit të limituar të ndihmës së specialistëve si pasojë e ndjekjes së grafikut të pushimeve vjetore, është e pamundur kryerja e veprimeve të vëzhgimit të fshehtë të personave dhe mjediseve në këtë periudhë kohore”, shkruhet në përgjigjen drejtuar prokurorisë, e cila mban datën 23 gusht të muajit të kaluar.
Ndërsa dokumenti mban firmën e drejtorit të policisë së Elbasanit Idajet Faskaj. Sa i përket emrit që do të duhej të vihej nën survejim, ai nuk është bërë publik. Por, të gjitha dyshimet të çojnë tek grupi që u përplas me policinë mbrëmjen e 18 shtatorit.
Megjithatë, drejtori i Sigurisë Publike të policisë, Altin Qato ka një jusftikim për këtë rast, duke nxjerrë zbuluar se policia nuk ka njerëzit e duhur për të kryer veprime të tilla të specializuara.
“Policia ka një organikë të limituar, për të bërë këto veprime të specializuara. Edhe përgjigja që është dhënë, normalisht është korrekte, sepse të gjithë punonjësit janë të specializuar, por jo çdo punonjës mund të bëjë këto veprime të specializuara, pasi janë punonjës të veçantë, dhe është kthyer kjo përgjigje për momentin sepse disa janë të angazhuar në operacione të tjera, jo se janë me pushime, duhet të bëhet një kalkulim, të lehtësohen nga detyrat që mund të jenë më pak të rëndësishme se sa ky rast. Policia nuk i bën veprimet pa miratimin nga gjykata”, shprehet Qato në “Opinion”.
Prokuroria për krime të Rënda kishte kërkuar mbajtjen nën përgjim të këtij personi, por policia thotë se për shkak të pushimeve dhe aksioneve të policisë në terren e ka të pamundur ta vendosë këtë person nën përgjim.
Tirana Today
