Një pako e dyshimtë ka alarmuar banorët në qytetin e Elbasanit. Burimet paraprake bëjnë me dije se pakoja është vendosur në një nga rrugët kryesore të qytetit, përkatësisht në segmentin që lidh bulevardin kryesor me Drejtorinë e Policisë.
Të njëjtat burime shtojnë se pakoja është pikasur rastësisht nga kalimtarët. Ata kanë dëgjuar një zhurmë, dhe më pas kanë parë pakon e dyshimtë të vendosur në rrugë. Menjëherë ka mbërritur në vendngjarje edhe policia, e cila ka evakuuar gjithë zonën.
Në vendngjarje kanë mbërritur ekspertë të fushës së eksplozivëve, si dhe një shërbim zjarrfikës, të cilët po bëjnë verifikimin e llojit të eksplozivit, për të bërë edhe shpërthimin. Policia ka vendosur një perimetër të gjatë sigurie, ndërsa ekspertët janë duke punuar për shpërthimin e kontrolluar të lëndës plasëse.
