Ka ndërruar jetë në moshën 57-vjeçare, Jhon Jairo Velazquez, i njohur ndryshe si krahu i djathtë i Pablo Escobar.
Instituti Kombëtar i Ndëshkimit dhe Burgjeve në Kolumbi deklaron se ai vdiq në orët e para të mëngjesit, pasi vuante prej kohësh nga kanceri. Sipas ‘The Sun’, 57-vjeçari ishte diagnostifikuar me kancer në ezofag në 31 dhjetori të 2019 dhe që nga ajo kohë ka qenë i shtruar në spital.
Me kalimin e kohës sëmundja iu përhap edhe në mushkëri, mëlçi dhe organe të tjera. Velazquez, i njohur ndryshe edhe me emrin “Popeye” ka vrarë më shumë se 3 mijë njerëz. Mediat e huaja shkruajnë se ai ishte mendja kryesore pas atentatit gjatë luftës së kartelit “Medellin” të Escobar kundër rivalëve të tyre dhe shtetit kolumbian, ku u hodhën në erë 200 makina .
Ai është gjithashtu i përfshirë në rrëmbime të profilit të lartë, përfshirë këtu rrëmbimin e Prokurorit të Përgjithshëm, Carlos Mauro Hoyos. Gjithashtu emri i Velazquez është i përfshirë edhe në bombardimin e një aeroplani tregtar, ku vdiqën 107 persona. “Popeyes” u burgos në 1993 dhe u la i lirë në 2014.
