Tashmë janë mbyllur hetimet për Përparim Ademin, i akuzuar për vrasjen e motrave Zhaneta Metani dhe Kristina Bardhi para djalit të mitur 14 vjeçar, në dhjetor të vitit 2020. Prokuroria e Tiranës ka përfunduar edhe akt ekspertimin, mbi gjendjen e tij mendore dhe ka rezultuar pa probleme. Pritet që dosja në ngarkim të tij të dorëzohet në Gjykatën e Tiranës, me akuzën e vrasjes ndaj dy ose më shume personave për shkak të marrëdhënieve familjare.
Nga hetimet ka rezultuar se 59-vjeçari nuk pranonte ndarjen nga dy motrat me të cilat kishte një lidhje jashtëmartesore. Ngjarja tragjike u shënua mëngjesin e 31 dhjetorit të vitit të kaluar, në zonën e Astirit, në banesën e motrave Metani e Bardhi.
Përparim Ademi kishte një lidhje jashtëmartesore me të dyja motrat, të cilat i vrau paraditen e 31 dhjetorit me breshëri plumbash në shtëpinë tyre, në zonën e Astirit në Tiranë.
Shkak për ngjarjen dyshohet se u bë xhelozia e Ademit ndaj Zhanetës, që besonte se e tradhtonte me një person tjetër. Me Zhaneta Metanin ai kishte dy fëmijë, një djalë dhe një vajzë. Pas vrasjes së dyfishtë në Astir, bashkëshortja e Përparim Ademit ka treguar se si është njohur më viktimat dhe kërcënimet që ka marrë nga familjarët e tyre pas ngjarjes së rëndë.
“Kërkoj mbrojtje nga shteti dhe nga policia, do zhdukem se do me vrasin të gjithë. Unë kam pas hyrje-dalje me to, kam pas hyrje-dalje që mos prishja familjen time. Unë nuk e shtyva burrin të bënte vrasjen”, ka thënë ajo më herët.
Bashkëshortja e 59-vjeçarit, ka mohuar akuzat se burri i saj trafikonte fëmijë. “Nuk janë të vërteta akuzat për trafikim fëmijësh, janë të gjitha rrena. Nuk ka shitur asnjë fëmijë. Më vjen turp, por ata duan shtëpitë”.
Sipas vëllait të viktimave, 59-vjeçari Ademi ka shfrytëzuar Zhaneta Metanin dhe Kristina Bardhin për prostitucion, si dhe u ka trafikuar fëmijët.
