Një ngjarje e rëndë ka ndodhur pas mesnate në Lezhë, në zonën e njohur si “Gajush”, ku është ekzekutuar një 26 vjeçar. Bëhet fjalë për shtetasin Xhulio Prela, me detyrë efektiv i Policisë së Shtetit pranë repartit të Forcave të Ndërhyrjes së Shpejtë në Shkodër. Prela, një polic i ri, me 2 vite eksperiencë, një vit në Lezhë e më pas është transferuar në Shkodër, është ekzekutuar me armë zjarri. Një plumb që ka marrë pranë zemrës, i ka marrë jetën.
I riu është gjetur i vrarë në Gajush rreth orës 02:20, ndërsa trupi është dërguar në morgun e spitalit rajonal të Lezhës, ku i është nënshtruar ekzaminimit të mëtejshëm. Fillimisht policia ka dyshuar se bëhej fjalë për vetëvrasje, por nga kqyrja e plagëve është parë se efektivi është qëlluar për vdekje dhe më pas ka humbur edhe kontrollin e mjetit tip Volkswagen që po drejtohej prej tij dhe ka dalë nga rruga.
Xhulio Prela nuk ka patur asnjë konflikt personal të mëparshëm, dhe paraprakisht dyshohet se ngjarja lidhet me probleme të ndryshme gjatë ushtrimit të detyrës.
Lezhë/Informacion paraprak
Më datë 05.12.2020, rreth orës 02:20, në Sallën Operative të DVP Lezhë ka ardhur një telefonatë se në aksin rrugor Milot-Lezhë, në Gajush, një automjet ka humb kontrollin dhe ka dalë nga rruga.
Menjëherë kanë shkuar shërbimet e Policisë ku kanë konstatuar në mjetin tip “Volkwagen” shtetasin Xh.P., 26 vjeç, punonjës Policie i FNSH Shkodër, i cili kishte humbur jetën.
Nga veprimet paraprake dyshohet ka humbur jetën nga përdorimi i armës së zjarrit.
Për zbardhjen e ngjarjes është ngritur një grup i pocaçëm hetimor me ekspertët më të mirë të Policisë Kriminale nga Departamenti i Policisë Kriminale dhe të DVP Lezhë, nën drejtimin e Prokurorisë ku vijon intensivisht puna për sqarimin e rrethanave të ngjarjes, me qëllim identifikimin dhe kapjen e autorëve.
Shërbimet e Drejtorisë Vendore të Policisë Lezhë, mbështetur nga FNSH Shkodër dhe forcat speciale RENEA, kanë ngritur pika kontrolli dhe po kontrollojnë zonën për shoqërimin e personave të dyshuar si autorë të ngjarjes apo që mund të kenë dijeni për ngjarjen.
