Efektivi i FNSH, Xhulio Prela, është nxjerrë në pritë për t’u ekzekutuar. Familjarët shprehen se ai është marrë në telefon nga dikush, dhe më pas është nisur drejt Lezhës.
Martin Prela, i ati i viktimës ka folur për ‘Report Tv’, duke thënë se e ka takuar të birin mbrëmë dhe kanë darkuar së bashku. Më pas ai ishte nisur drejt Rinasit. Sipas të atit, Xhulio Prela rreth orës 00:00 ka dal nga shtëpia, pasi në 01:00 do të priste një mik.
“E kam takuar mbrëmë, kemi ngrënë darkë bashkë dhe është nisur për në Rinas. Rreth orës 00:00 ka dal nga shpia, pasi në 01:00 do zbriste miku në Rinas. Nuk kemi asnjë hasmëri, Xhulio nuk fliste shumë për punën.
Puna edhe mund të jetë shkak, por nuk e di. Disa shqetësime mi pati thënë nga puna, presione, por përgjithësisht janë shqetësime që i kanë të gjithë policët. Ne nuk e dimë se nga ka ardhur”, tha i ati Martin Prela.
FNSH dhe RENEA janë duke krehur zonën, në kërkim të autorit apo autorëve të dyshuar për vrasjen e efektivit të policisë, Xhulio Prela mëngjesin e sotëm në fshatin Gajush. Deri më tani janë shoqëruar në polici 15 të dyshuar, apo persona që mund të kenë dijeni për ngjarjen e rëndë.
Xhulio Prela u gjet i pajetë në makinën e tij mëngjesin e sotëm, ndërsa mësohet se ka qenë një plumb në zemër që i ka shkaktuar vdekjen.
