Me kalimin e orëve, detaje të reja janë hedhur në dritë lidhur me ekzekutimin në ‘Astir’. Policia ka kontrolluar zonën në çdo cep, e ndërsa autori rezulton me tre emra.
Pas krimit të rëndë që tronditi zonën e ‘Astirit’ në kryeqytet, policia bën me dije se autori i dyshuar që shpalli në kërkim një ditë më parë, është ai që ka kryer vrasjen e Vilson Tafçiut. Ky person rezulton me tre identitete dhe ka qëlluar disa herë viktimën me armë zjarri, duke i marrë jetën.
Familjarët e të akuzuarit janë marrë në pyetje nga policia, duke u shprehur se e njihnin viktimën si shok të djalit, dhe e dinin që midis tyre kishte një zënkë, por pa e ditur motivin.
Viktima dhe autori, shok me njëri-tjetrin kanë qenë bashkë në Francë dhe Zvicër, ku edhe andej kanë pasur konflikte.
Detaje të reja nga ekzekutimi i 28-vjeçarit te ‘Astiri’. Ja pista ku po hetohet
Njoftimi i policisë
Strukturat e Drejtorisë Vendore të Policisë Tiranë, nën drejtimin e Prokurorisë së Tiranës, po vijojnë intensivisht punën për zbardhjen dhe dokumentimin me prova ligjore të ngjarjeve të ndodhur në Allias dhe në Astir.
Si rezultat i punës profesionale, reagimit të menjëhershëm të strukturave të Policisë dhe bërjes së një sërë veprimesh proaktive, grupi i posaçëm hetimor ka mundur të dokumentojë me prova ligjore ngjarjen e ndodhur në orët e mbrëmjes së datës 20 janar 2020 në Astir, ku mbeti i vrarë me armë zjarri 29-vjeçari V. T.
Bazuar në veprimet e kryera dhe provat e grumbulluara rezulton se si pasojë e një konflikti të çastit, shtetasi N. D., alias N. K., alias M.P., 29 vjeç, në orën 20:30 të mbrëmjes së datës 20 janar, në rrugën “Dhaskal Todri”, në Unazën e Re, ka qëlluar disa herë me armë zjarri duke vrarë shtetasin V. T.
Policia e Tiranës ka shpallur në kërkim policor 29-vjeçarin dhe gjatë ditës së djeshme dhe mëngjesit të sotëm ka ushtruar një sërë kontrollesh në disa ambiente dhe terrrene, ku dyshohej se mund të fshihej 29-vjecari dhe vijon punën e pandërprerë për kapjen e tij.
Policia e Tiranës garanton qytetarët se është tërësisht e angazhuar për të parandaluar, evidentuar dhe goditur paligjshmërinë, si dhe fton qytetarët për të bashkëpunuar më tej, në drejtim të krijimit të një ambienti sa më të sigurt.
