Ish-polici grek, Ethimious Efthimiou është dënuar me burgim të përjetshëm, për vrasjen e Devi Kasmit. Dënimi është dhënë sot nga trupa gjykuese, gjatë seancës së mbajtur në GJKKO. Ndërsa Elton Halipaj, bashkëpunëtori i tij në krim, u dënua me 33 vite burg.
Kjo ishte pretenca që dha Prokuroria më herët për grekun ekzekutor, ndërsa për Halipjan, kërkoi 35 vite burg.
Devi Kasmi u ekzekutua në Tiranë, pas një prite të ngritur në rrugën “Kongresi i Manastirit”. Dy persona me motoçikletë, shtinë mbi 41-vjeçarin, duke e lënë të vdekur. Ata kanë qëlluar pesë herë, në kokë dhe në trup, duke u siguruar për ekzekutimin e shënjestrës së tyre. Identifikimi i grekut u bë nga kamerat e sigurisë, ku dukej një furgon i bardhë me të cilin ata afrohen pak momente para se të vritej Kasmi, e më pas largohen me të njëjtin mjet.
