Një ngjarje e rëndë tronditi Haitin në orët e para të mëngjesit të ditës së sotme, pasi Presidenti i vendit Jovenel Moise, u ekzekutua në rezidencën e tij private, nga disa persona të armatosur, teksa bashkëshortja e tij mbeti e plagosur.
Mediat vendase, kanë publikuar pamjet e sulmit të sotëm rreth orës 01:00, ku në portën e rezidencës së Moise, shihen disa persona të armatosur. Pasi kanë qëlluar mbi rojet, ata kanë hyrë brenda rezidencës ku kanë qëlluar për vdekje Presidentin.
Lidhur me ngjarjen e rëndë, reagoi dhe kryeministri i përkohshëm, Claude Josep i cili e konsideroi vrasjen e kreu të shtetit si një krim të tmerrshëm dhe çnjerëzor.
Joseph tha se autorët flisnin spanjisht, duke shënjestruar kartelet e vendeve latine si autorë të kësaj vrasjeje.
“Rreth një në orën e mëngjesit, gjatë natës së së martës 6 deri të mërkurën 7 korrik 2021, një grup individësh të paidentifikuar, përfshirë disa që flasin spanjisht, sulmuan rezidencën private të presidentit dhe plagosën fatalisht kreun e shtetit”, tha ai.
Jovenel Moise, ishte në pushtet që prej shkurtit të vitit 2017, pasi paraadhësi i tij, Michel Martelly u largua nga posti. Periudha kur Moise ishte në detyre ishte mjaft e vështirë pasi qeverisja e tij u përball me shumë akuza për korrupsion si dhe për këtë gjë në vend shpërthyen protestat e dhunshme anti-qeveritare.
https://www.youtube.com/watch?time_continue=1&v=wXGFNX4XaRo&feature=emb_title
